Avtomatik yanğınsöndürmə sistemləri (AYSS) ilk mərhələdə quruluşuna görə lokal və mərkəzləşdirilmiş olmaqla iki əsas kateqoriyaya ayrılır. Bundan əlavə, iş mexanizminə əsasən sprinkler və drençer tipli sistemlər kimi təsnif edilir. Söndürmə üsuluna görə isə onlar istifadə olunan odsöndürücü maddənin fiziki xüsusiyyətləri və kimyəvi tərkibi ilə fərqlənirlər.

İstənilən AYSS-in strukturunda yanmanın ilkin əlamətlərini – tüstü, temperatur artımı və digər risk göstəricilərini qeydə alan sensor, idarəedici siqnalları emal edib ötürən blok və birbaşa söndürmə prosesini həyata keçirən icra mexanizmi mövcud olmalıdır. Lokal sistemlər bu komponentləri daşına bilən və vahid konstruksiyada birləşdirilmiş modul şəklində təqdim edir. Ən sadə və eyni zamanda etibarlı lokal həll – daxilində odsöndürücü maddə saxlanılan təzyiqli balondur. Bu tip qurğularda təzyiq ya xüsusi kimyəvi proses hesabına, ya da idarəedici impuls vasitəsilə qorunur.

Belə sistemlərdə bağlayıcı mexanizm funksiyasını adətən sprinkler başlığı yerinə yetirir. Sprinklerin daxilində yerləşən istiliyə həssas element müəyyən temperatur həddində (təxminən 40°C-dən 150°C-yə qədər) aktivləşir. Adətən bu qurğular yanğın siqnalizasiya sisteminə yalnız xəbərdarlıq elementi kimi qoşulur. Bununla belə, prinsip etibarilə bəzi lokal sistemlər elektrik enerjisi və naqil bağlantısı olmadan da işləyə bilir. Onların mənfi cəhətləri isə nisbətən yüksək maya dəyəri, böyük çəkisi, texniki xidmətin mürəkkəbliyi və işə düşmə qərarının daha dəqiq analiz imkanlarının məhdudluğudur.

İri obyektlər üçün mərkəzləşdirilmiş AYSS daha səmərəli hesab olunur. Bu sistemlərdə çoxsaylı həssas sensorlardan və yalnış aktivləşməni minimuma endirən məntiqi idarəetmə bloklarından istifadə edilir. Bu yanaşma yanğına operativ və dəqiq reaksiya təmin edir. Lakin belə sistemlərin tətbiqi üçün bütün sahələrdə elektrik təchizatı, siqnal xətləri və yüksək təzyiqli boru magistralları mövcud olmalıdır.

Kiçik otaqlarda və ya yanğının yayılmasını məhdudlaşdıran arakəsmələrlə bölünmüş sahələrdə ayrıca sprinklerlərin quraşdırılması daha məqsədəuyğundur. Aktivləşmə zamanı bu sprinklerlər odsöndürücü maddəni birbaşa alışma nöqtəsinə yönəldir. Əgər magistralda təzyiq azalarsa, nəzarət-siqnal klapanı avtomatik olaraq nasosu işə salaraq maddənin verilməsini davam etdirir. Boru xətlərinin donma riski olan obyektlərdə isə sistem hava təzyiqinin dəyişməsinə reaksiya verir və borularda maye daimi saxlanılmır.

Alovun sürətlə yayıla biləcəyi geniş sahələrdə isə bütün ərazini eyni vaxtda əhatə edən söndürmə tələb olunur. Belə hallarda drençer sistemləri tətbiq edilir. Drençer quruluşunda hər püskürdücüdə ayrıca klapanın olmasına ehtiyac yoxdur və magistralda daimi təzyiq saxlanılmır. Yanğın zamanı odsöndürücü maddə ya avtomatik nəzarət siqnalı ilə, ya da məsul şəxsin əl ilə müdaxiləsi nəticəsində sistemə ötürülür.

ISF MMC hər bir obyektin funksional təyinatını, texniki xüsusiyyətlərini və iqtisadi səmərəliliyini nəzərə alaraq uyğun sistemlərin layihələndirilməsi və quraşdırılmasını həyata keçirir. Eyni zamanda, zəmanət müddətindən sonrakı servis və planlı texniki xidmət üzrə, o cümlədən digər təşkilatlar tərəfindən quraşdırılmış sistemlərə dair müqavilələr bağlamağa hazırdır.